Roxas City, Capiz- Ginpangunahan kahapon nga adlaw sang Capiz Provincial Environment and Natural Resources Office (CaPENRO) ang orientation/seminar may kaangtanan sa pag-impose sang buhis sa small scale mining, gravel, sand kag iban pa nga quarry resources sa probinsya sang Capiz.
Yara nagtambong sa amo nga orientation/seminar ang pila ka mga empleyado sang provincial capitol, Dumalag, Tapaz, Panitan kag Pontevedra samtang pila naman ka mga munisipyo ang naka-schedule sa maabot nga Setyembre 4, 2018.
Samtang sa amo man nga sinapol, gin-organisar ang Municipal Monitoring Committee nga ginalakipan sang representante halin sa kapulisan, mga Sangguniang Bayan Member nga Chairman sang Committe on Environment, Municipal Engineer, Municipal Environment Officer, representative halin sa mga accredited non-governmental organization kag religious sector. Samtang ang Barangay Monitoring Committee naman ang dapat nga ginabug-osan sang mga kapitanes, Barangay Kagawad nga chairman sang Committe on Environment, representative halin sa accredited non-governmental organization kag religious sector.
Maga-asister naman ang Task Force Aksyon Bantay Grabas nga gin-deputized ni Governor Antonio A. Del Rosario para nga magpangdakop sa mga nagabayolar.
Sa iya mensahe, ginsiling ni CaPENRO head Atty. Emelyn Arboleda-Depon nga dako ang pagkakinahanglan nga ma-regulate ang quarrying sa probinsya sang Capiz agud nga malagas ang mga indibidwal nga nagapatigal sang ilegal nga aktibidad nga nagaresulta sang pagguba sang palibot.
photo © CaPENRO images
