iFM Laoag – Indauluan ni Provincial Agrarian Reform Program Officer II (PARPO II) Vic M. Ines ti pannakaibunong ti innem a pulo a burias kadagiti agrarian reform beneficiaries (ARB) iti ili ti Nueva Era.
Dagiti naikkan ti taraknen a burias ket dagiti kamkameng ti Tribal Agrarian Reform Cooperative iti Barangay Poblacion iti nasao nga ili.
Maisaruno met a maited ti tallopulo ket uppat a burias kadagiti ARB manipud iti Lucky Agrarian Reform Cooperative iti ili ti Solsona.
Dagiti burias ket napasurutan pay kadagiti starter, grower ken finisher feeds kas tulong iti nasayaat a pannakatarakenda.
Iti met Barangay Garnaden iti ili ti Nueva Era, ginasgasut a sako ti fertilizer, insecticide ken pesticide ti naibunong kadagiti farmer beneficiaries ti Comprehensive Agrarian Reform Program.
Inbatad ni PARPO II Ines a dagiti nasao nga aktibidad ket naipatungpal babaen ti Convergence on Livelihood Assistance for Agrarian Reform Beneficiaries Project wenno CLAAP.
Ti CLAP ket programa a nagbinnuligan ti Department of Agrarian Reform ken Department of Social Welfare and Development tapno matulungan dagiti ARB a maparang-ay pay ti panagbiagda. [Detalye manipud ken ni Jorge Guerrero]
– Bernard Ver, RMN News
