iFM Laoag – Indauloan ni Engr. Leandro M. Caymo, baro a Regional Director ti DAR Region I, ti pannakaibunong ti tallo a traktura ken uppat a hauling truck kadagiti Agrarian Reform Beneficiaries Organizations wenno ARBOs iti Ilocos norte.
Inpalgak ni Provincial Agrarian Reform Program Officer II Vic M. Ines a dagiti ARBOs a naikkan ti tractor ket dagiti sumaganad: San Cristobal Multipurpose Cooperative ti Sarrat; Bomitog Multipurpose Cooperative ti Banna; ken Sansa Nagcamarinan Irrigators Association ti Burgos.
Dagiti met recipient ti hauling truck, kuna ni Ines, ket ti Catangraran Agrarian Reform Cooperative ti Solsona, Tambidao Multipurpose Cooperative ti Bacarra, Namnama ARBs Multipurpose Cooperative ti Piddig ken Catuguing Multipurpose Cooperative ti San Nicolas.
Ti balor ti kada tractor, karaman dagiti maikabit a farm implements, ket agarup P950,000. Kabayatanna, nasurok met a P1.1 Million ti balor ti maysa a hauling truck.
Itay kallabes, naiwayat ti pannakapirma ti Memoradum of Agreement (MOA) iti nagbaetan ti DAR Ilocos Norte ken dagiti recipient dagiti nadakamat a “pre and post harvest facilities.”
Ti pannakaibunong dagiti traktura ken hauling truck ket paset pay laeng ti Climate Resilient Farm Productivity Support Program ti DAR Ilocos Norte. [Detalye manipud ken ni Jorge Guerrero]
Bernard Ver, RMN News
