Davao City – Padayong ginamonitor sa Office of Civil Defense kun OCD XI ang natigayong linog kagahapon sa buntag sa Davao Oriental diin ang maong lugar gitay-ug sa Magnitude 5.0 nga linog alas 9:16 sa buntag.
Sa interview sa DXDC RMN Davao kang OCD XI Regional Director Leoncio Cirunay, sigun niini nga gina-monitor nila ang maong lugar tungod base sa report sa Philippine Institute of Volcanology and Seismology (PHIVOLCS) dunay mga aftershocks nga matigayun tungod sa maong pag tay-ug.
Dugang ni Cirunay, ginasuta pa usab nila og duna bay damyos ug dunay mga naapektuhan sa maong linog.
Base sa report sa PHIVOLCS, tectonic ang tinubdan sa maong linog diin dunay 46 kilometros ang gilay-on sa sidlakang bahin sa may Caraga, Davao Oriental nga dunay giladmon nga 23 kilometros gani nabatian usab kini sa Bislig City, Surigao del Sur sa kakusgon nga intensity III.
Padayong pahimangno sa OCD XI ngadto sa publiko nga kanunay mag-igmat ug mag-andam tungod dili matagna og kanus-a mahitabo ang linog.
Gani karong umaabot nga Disyembre 15, sumala ni Cirunay, laing hugna na usab sa Earthquake drill ang ipahigayon ilabi na sa mga eskwelahan dinhi sa syudad sa Davao.
RadyoMaN Renz Barbarona
