Davao 11 Tribes

36

Davao City – Bahandi ug dakong garbo sa dakbayan sa Davao ang mga lumulupyo niini, ang mga Davaoenos. Dala ang maanindot, pinasahi ug abunda nga tradisyon ug kultura.

Atol sa 34th Kadayawan Festival sa dakbayan sa Davao, bida ug highlight ang onse ka mga tribu nga maoy gigikanan sa mga Davaoeños.


Ang tribung ATA o “dwellers in higlands” gikonsiderang mas hanas nga hud-ong sa katawhan diin aduna kini gigikanan nga Negritos ug mga Malays.

Tribung IRANUN, naila isip pinaka isog nga mga pirata sa kalibutan sa mga Malay.

Tribung KAGAN, ilado sa natad sa agrikultura sama sa pag-uma ug pagpananum og humay, mais, abaca ug lubi, samtang panagat usab ang panginabuhi-an niadtong nagpuyo daplin sa baybay.

Tribung BAGOBO KLATA, nag-okupar sa gamayng teritoryo nga nahimutang gikan sa Catalunan hangtud sa Calinan sa syudad.

Tribung MAGUINDANAON, nagsugod sa Maguindanao apan sa kasamtangan, sila makita sagad sa ikatulong distrito sa syudad ug kasikbit nga mga probinsya.

Tribung MARANAO, tribong ilado sa ilang traditional nga bisti sa tanang Filipino ethnic groups ug mas naila karon sa pagkamakugihon kun pagka-negosyante.

Tribung MATIGSALOG o ‘river people’ diin sagad nahimutang ang ilang panimalay daplin sa kasapaan.

Tribung OVU-MANUVO, naila sa ilang intricate casting, fine weaponry, ug jewelry.

Tribung SAMA, gihulagway isip mga indibidwal nga mahigugmaon sa kalinaw ingon man sa panaghiusa.

Tribung TAGABAWA, giingong maoy pinaka intelihenteng mga lumad sa tibuok Pilipinas. Ug ang ika-onse mao ang tribung TAUSUG, naila sa ilang kaisog ug kadasig. Loyalty usab ang pinaka bililhong kinaiya sa maong tribu.

Samtang makabilib si Datu Jaime Epi, 79-anyos sa tribung Ubo Manovo nga bisan walay nagtudlo, nakat-on siya sa instumentong kulintang dihang siya 7-anyos pa lamang.

“Kini pag-okasyon. Ingon aron, okasyon man ‘ron, Kadayawan. Unya ang among tinugtugan kinaiyahan gyud na. Welcome! Salamat nga nagkakita-kita ta. Mao nay tumong ug tinguha niini,” saysay ni Datu Jaime Epi.

Pipila sa mga okasyon nga ilang ginaduyogan sa kulintang mao ang pag-welcome sa bisita, okasyon sa kasal ug bisan sa okasyon sa patay.

Sumala usab ni Alvin Mustapha Nasif, sa tribung Maranao, iyang gipangninaut nga mas mapalambo pa ang ilang kultura’g tradisyon alang sa mga musunod pa nga henerasyon.

“Yung susunod naman na henerasyon ay sana kung ano man ‘yung naging kulang sa amin, yung sa dati ay sana mapunan nila. ‘Yun bang ma-achieve pa nila ‘yung magagandang asal na iniwan sa amin ng mga ninuno naming, pamana nila,” saysay ni Nasif.

Sa laing bahin mulingaw ug motagbaw usab sa panan-awon sa lokal ug mga bisita ang “art wall” nga gipinturahan kun gipintalan sa mga nagkalahi-lahing pintor kun visual artists sa syudad subay sa Mugna Kadayawan mural painting competition. Kini nagsimbolo usab sa kahanas ug ka artistic sa mga Davaoeños.

Ang atong pagpreserba ug pag-atiman sa onse ka talagsaon, mabulokon ug nagkadaiyang tribu sa dakbayan sa Davao ang bugtong yawe aron matagamtaman pa sa sunod nga henerasyon ang mga bunga nga hatud sa inato nga kultura ingon man puno sa diwa nga tradisyon sa atong lumadnong kagikan.

Alang sa Kadayawan 2019 Special Coverage, RadyoMaN Kirby Manzon, Tatak RMN!

Facebook Comments

From Advertisers