Davao City – Gibutyag ni Davao City Mayor Sara Duterte-Carpio nga sa kasamtangan, walay direktang international flights ang ginadawat sa Davao International Airport (DIA) apan aduna gihapoy domestic flights nga naga abot.
Kini nunot sa pagsiaw sa bag-ong variant sa coronavirus diin nagpatuman na og travel ban ang Pilipinas sa kapin 30 ka mga nasud, diin matud sa Mayor posibleng dugay na miabot sa Pilipinas apan karon lang nakapahigayon og testing ug na-detect ang maong mas delikadong matang sa virus.
“The Davao International Airport (DIA) has no international flight. So, wala ‘tay mga pasahero dinha nga gikan sa gawas, abroad, overseas na deritso nisulod sa DIA. We only have passengers nga gikan sa domestic airports,” butyag sa Alkalde.
Bisan pa man, padayong gina-check sa DIA authorized personnel ang RT-PCR result sa mga muabot nga pasahero, diin ingon man pag-authenticate sa mga dokumentong kinahanglang ipresenta sa usa ka pasahero.
Nasayran nga gisuspende sa lokal nga gobyerno ang COVID-19 testing upon arrival sa DIA tungod sa pag-redirect sa resources alang sa local transmission sa dakbayan.
RadyoMaN Kirby Manzon
