Davao City – Angayan lamang nga makaangkon ug mga pasidungog ang syudad sa Davao tungod sa iyang mga maayong programa nga naglantaw diha sa mga katungod sa kabataan ug ang pagpangandam kung adunay kalamidad nga masinatian sa dakbayan.
Sumala ni kanhi City Social Service & Development Office (CSSDO) assistant head Liwayway Caligdong, garbo usab natong taga-Davao nga nakakuha sa maong pasidungog isip ‘Best Disaster Risk Reduction Council’ ug ‘Most Child-Friendly City for Highly Urbanized Category’ ning tuiga tungod sa pagtinabangay sa nagkadaiyang ahensya sa lokal nga gobyerno alang sa mga programa.
Giingon ni Caligdong nga usa sa nakaayo niini tungod kay ang syudad adunay kaugalingong ‘Council for the Welfare of Children’ ug mga kahimanan nga sarang magamit panahon sa mga kalamidad apil na niini ang mga personahe nga kompleto sa mga training o seminars.
Gipasabot pa usab sa kanhi opisyal sa CSSDO nga gikinahanglan magpadayon ang mga nasugdang programa ug dili na lang diha kutob sa paghuman nakadawat ug pasidungog matud niya kinahanglang adunay himoon pang mga innovations aron pa gyudmas molambo ang atong mga program priorities.
RadyoMaN Bernard Pantallon
