Davao-Based American Environmentalist positibo sa COVID-19

37

Davao City – Nagpositibo sa COVID-19 ang Davao-Based American Environmentalist nga si Darrell Blatchley.

Kini ang gikumpirma ni Blatchley sa iyang post sa facebook nga nagpositibo siya sa COVID-19 human migawas ang resulta sa iyang swab test ug x-ray kagahapong adlawa.

Sa pakighinabi sa DXDC RMN DAVAO kang Blatchley, wala gilimod niini ang balatian nga COVID-19 apan alang kaniya dili kini silot-kamatayon nga miabot sa iyang kinabuhi karong panahona.

Una ang adlaw sa kumpirmasyon, nakahatag pa og katikaran sa facebook si Blatchley labot sa kondisyon sa iyang pagginhawa diin gikuha sa ambulansya ug gidala sa ospital ang maong Amerikano Sabado sa kahapunon sa miaging semana.

Na-leksyon karon si Blatchley nga bisan tuod og dunay facemask apan dili gihapon angay kumpiyansahan ang kagaw ug bisan kinsa puwede matakdan kon matakbuyan sa mao nga balatian.

Nanghinaut si Blatchley kinsa padayon nagpaalim na karon nga magsilbi unta nga pasidaan ug mag amping uban sa dakong pagsalig sa Dios aron dili makuntamina sa pandemic virus.

Si Blatchley mao’y Presidente ug Founder sa D’Bone Collector Museum ug aktibo nanawagan sa pagban kon pagdili sa paggamit sa single-use plastics ug proper waste disposal dinhi sa dakbayan.




Si Blatchley maoy pinaka-una nga langyaw nga nahimong recipient sa Datu Bago Award niadtong tujig 2015 ug nahataga usab og First Prize of the Plastic Initiative Award gikan sa Regional office of the United Nations Education, Scientific and Cultural Organization nga gipahigayon sa National Science Museum sa nasud Thailand.

RadyoMaN Joel Viray

Facebook Comments