Davao City – Dungan sa paglutaw sa giingong ‘Davao Bunal Squad’, mireklamo ang pipila ka mga inahan sa Barangay 76-A gumikan kay naapil sila sa mga nabiktima niini.
Atol sa interbyu kang Brgy. 76-A Chairman Rolando Trajera sa tulumanong ‘Straight to the Point,’ gibutyag niini nga hagbay na niyang nadungog ang ingon apan walay midangop sa barangay hall aron mureklamo labot niini.
“Basin nag-apil-apil na didto sa mga kabatan-onan nga nag standby pero wala ko kabalo ana… Kanang mamunalay pod di man pod mamunal na og babaye o tigulang, maong kami kauban sa mga tanod nagabantay na pod,” segun niini.
Saysay ni Trajera nga bisan wala siya nasayud kun kinsay nagpaluyo niini, gilantaw niini nga epektibo ang maong grupo sanglit mingaw na ug walay tambay sa kadalanan sa iyang barangay atol sa iyang pag-roving alas-11:00 sa gabii ngadto alas-3:00 kaganina sa kaadlawon.
Dugang sa kapitan nga beripikahon nila ang giingong nabiktima sa pagpamunal ug manduan ang mga Barangay Tanod nga ilhon kung kinsa man ang nagapamunal nga grupo.
RadyoMaN Jason Amisola
