Davao City – Kung ikumpara ang Davao City sa ubang lugar sa nasud, hitsas na kaayo ang atong preparasyon kung ang hisgutan mao ang kaandam sa tanan sa kalamidad sama sa bagyo, linog ug uban pa.
Ang kagamhanang lokal migasto og milyones ka pesos diha sa pagbansay sa mga ilang mga personahe aron andam sila sa igong kahibalo diha sa pagresponde panahon sa emerhensiya.
Kini napamatud-an ni Davao City-based American biologist ug bone collector nga si Darryl Blatchley dihang usa siya sa mikuyog sa Davao Rescue Team sa Tacloban nga gilampornas kini ni bayong Yolanda niadtong 2015.
Sa nakita ni Blatchley, ang siyudad sa Dabaw andam na kaayo sa bisan unsang paghampak sa kalamidad sama sa bagyo gumikan sa pagbaton og sophisticated equipment ingon man sa pagmontar og Central 911 emergency line.
Kung duna pama’y area angay tagdon kini mao ang mga gambalay nga dugay nang natukod kun karaan na kaayo tungod sa peligro nga hatud niini ugaling muigo ang gikabalak-an sa tanan nga ‘The Big One’ nga linog.
Segun ni Blatchley, lakip usab palapdan ang hustong implementasyon sa mga emergency sirens aron ang katawhan sa pipila ka barangay dili maglibog ug dili masaypan ang tingog sa siren panahon nga adunay emerhensiyang mahitabo.
Bisan og eksperyensyado na ang mga Dabawenyo sa aspetong pagpreparar oras sa kalamidad, gikinahanglan gihapon nga makanunayon ang pagtagad nato sa kamahinungdanon sa preparasyon sa bisan unsang mga trahedya nga dala sa nagsalimuang nga kinaiyahan.
RadyoMaN Joel Viray
