Davao City – Positibo ang Davao City COVID-19 Task Force (TF) nga makab-ot sa City Government of Davao ang herd immunity sa pagbakuna batok Coronavirus Disease 2019 (COVID-19) una mahuman ang tuig 2021.
Matud ni Dr. Michelle Schlosser, Spokesperson sa Davao City COVID-19 TF (sa interbyu sa city-owned radio), kaya nga makab-ot ang herd immunity kung anaa usab ang kooperasyon sa katawhan ilabi na sa nagpadayong vaccination program sa lokal nga gobyerno.
“It is certainly very very achievable and very positive po (nga makab-ot ang herd immunity) if the people in Davao will cooperate. At the end of the day, ang success sa atong mga programa labi na gyud ang atong vaccination program is (magdepende) kung unsa ang reception sa atong mga katawhan,” saysay ni Schlosser.
Padayong giawhag sa health official ang katawhan ilabi na kadtong wala pa nabakunahan, nga magpabakuna na batok COVID-19 aron mas padali ang pagkab-ot sa herd immunity ug mamahimong maayo ang selebrasyon sa Pasko karong tuiga.
Sa latest Davao City Vaccination Report o ang datus base sa November 17, 2021 anaa na sa 985,049 ang nabakunahan sa first dose ug 895,829 sa second dose batok COVID-19 dinhi sa syudad sa Davao.
RadyoMaN Kirby Manzon
