Davao City – Anaa sa 95% na ang kahitsas sa syudad sa Davao alang sa umaabot nga ika-63 nga National Private Schools Athletics Association (PRISAA) Games 2019 nga mahinayon sa Mayo 19-24, 2019 dinhi sa dakbayan.
Atol sa gipahigayong iSpeak Forum, giingon ni Lita Anayon-Montalban, PRISAA president, nga nagapadayon karon ang ilang koordinasyon ngadto sa tanang principals sa kapin kun kulang 400 ka mga private schools nga mupartisipar karong tuiga.
Gikanayon niini nga ang kulang 5% mao ang ulahing board meeting nga mahitabo sa Mayo 17 alang sa kasayuran sa ubang rehiyon bahin sa mga balaud nga ginapatuman sa dakbayan diin kapin kun kulang 7,000 ka mga partisipante lakip na coaches ug pamilya sa mga players gikan sa 16 ka mga rehiyon sa Pilipinas ang gilaumang mobisita sa dakbayan.
Nasuta na usab ang mga gamitong billeting areas sa maong aktibidad diin adunay nakadeploy nga magbantay niini aron maseguro nga walay kawat mahitabo.
Walo ka mga dula ang ipahigayon sa University of Mindanao-Main Campus samtang pipila ipahigayon sa Agro Football Field, Rizal Memorial College campus, Matina Town Square, Abreeza Mall, ug Davao City Recreational Gym (kanhi Almendras Gym).
Bisan pa man dili maka tambong human personal nga giimbatahan niini si Pangulong Rodrigo Duterte, lauman nga anaa ang presensya ni Davao City Mayor Sara Duterte-Carpio, Chairperson ug Regional Directors sa CHED, DepEd Regional Directors, ug pipila ka mga focal persons dinhi sa syudad sa Davao.
Karong tuiga gigahinan og P10-M sa Philippine Sports Commission (PSC) ang maong aktibidad samtang P5-M ang gigahin nga operational budget sa Davao Region alang sa ilang mga atleta.
Tema karong ika-63 nga PRISAA mao ang ‘Sustaining Filipino Athlete for Global Competitiveness’ diin target sa Davao Region nga magpabilin sa Rank 3 o musaka sa number 1.
RadyoMaN Jason Amisola
