Davao City – Nagdagan na karon ang mga dokumento alang sa konstruksyon sa Davao City Hospital nga human naaprubahan ang ‘Davao City Hospital Ordinance’ sa 19th Davao City Council niadtong Martes (Mayo 4, 2021).
Sa interbyu sa DXDC RMN Davao kang Davao City Councilor Mary Joselle Villafuerte, proponent sa ordinansa, gibutyag niini nga sa pagkakaron gisubay pa ang proseso una pa kini pirmahan ni Davao City Mayor Sara Duterte-Carpio aron masugdan na ang proyekto.
“In the meantime while waiting, nitawag na ‘ta sa DOH. Ang arrangement nato is mag-submit ‘ta og certificate of need and then mag-comply ‘ta sa mga requirement para ma-approve ‘ta sa permit to construct,” segun ni Villafuerte.
Matud ni Villafuerte, gitakdang magtagbo ang city architect ug personahe sa University of the Philippines (UP) Mindanao Campus kabahin sa mamahimong disenyo sa pasilidad nga tukoron sulod sa tulunghaan sa Bago Oshiro, Mintal, Davao City.
Gipasabot sa konsehala, mamahimo gihapong modawat og mga pasyente gawas sa dakbayan apan prayoridad sa maong 100-bed Level III Training Hospital ang mga Davaoeños.
RadyoMaN Kirby Manzon
