Davao City – Gideklara ang Davao City nga adunay pinakataas nga kaso sa pagpangabuso sa tibuok Rehiyon 11 sa unang quarter karong tuig 2018.
Sumala ni Talikala Inc. Executive Director Jeanette Ampog, subay sa record sa Department of Social Welfare and Development (DSWD), adunay 21 na ka mga kaso sa pagpangabuso gikan Enero ngadto sa Marso karong tuiga diin 17 niini gikan sa Davao City samtang usa sa Davao del Nor, Davao Oriental, General Santos ug Sarangani Province diin sagad rason mao ang sexual exploitation sama sa child prostitution ug online pornography.
Segun ni Ampog, sagad nabiktima sa prostitusyon nag-edad sa 13-17 anyos.
Samtang adunay 96 ka mga kaso sa pagpangbuso sa milabay’ng tuig 2017 diin pinakataas nga kaso nag edad sa 7-12 anyos ug 18-35 anyos.
Dugang sa executive director sa Talikala nga sa 21 ka mga kaso, walo niini ang na-file na.
Gani nabalaka ang Talikala ingon man ang grupo sa kabatan-onan human masayran nga ika-unom ang Pilipinas isip pinakataas sa kaso sa exploitation sa tibuok kalibutan.
Sa pikas bahin, nanawagan si Jaziel Sinadjan sa Act for Children’s Alliance ngadto kang Davao City Mayor Sara Duterte-Carpio nga pakusgan ug pahugtan pa ang Davao City Children’s Welfare Code nga kaniadto pang 1994 na-aprubahan sa konseho.
RadyoMaN Jason Amisola
