Davao City – Gipailawom na ang probinsya sa Davao del Norte gawas sa Island Garden City of Samal sa Community Quarantine.
Nagpagula ang probinsya og Executive Order No. 2020-08 kagabie nga nagpahibalo sa publiko nga hingpit gilayon kining ipatuman.
Sa official statement ni Tagum City Mayor Allan Rellon ilawom sa maong EO ipatuman ang province-wide lockdown nga iimplementa sa tibuok probinsya sa Davao del Norte, tanang sakyanan gikan sa Davao de Oro, Davao City ug Bukidnon dili na pwede musulod sa Davao del Norte.
Matud ni Rellon nga dili na usa iimplementa ang nakatakda nga total lockdown sa Tagum City sugod March 16, 2020 isip pagsunod sa Executive Order nga gipagula sa probinsya. Tanang mga pampubliko ug pribadong sakyanan gikan sa mga syudad ug munisipyo sa Davao del Norte (Panabo, Carmen, Sto. Tomas, BE Dujali, San Isidro, Talaingod, New Corella, Asuncion, Kapalong) pwede na nga mulabay, musulod ug mugawas sa Tagum City.
Bisan na niini, magpabiling strikto ang screening process sa mga checkpoints alang sa tanang sakyanan nga musulod sa Tagum City para maseguro nga mapugngan ang pagsulod ug pagkuyanap sa virus sa syudad.
Dugang sa mayor nga magpabilin nga in full effect pa gihapon ang tanang mga policies ug regulations sa Community Quarantine sa Tagum City nga nakalatag sa Executive Order 2020-35.
Mas pakusgan sa Inter-Agency Management COVID-19 Crisis Management and Response Team sa Tagum ang mga lakang niini alang sa pagpakgang sa COVID-19.
RadyoMaN Aimee Guinita
