Davao City – Walay ipatuman nga travel ban sa mga biyahero gikan sa Northern Mindanao partikular na sa Cagayan de Oro City (CDO).
Kini ang gibutyag ni Davao City Mayor Sara Duterte-Carpio luyo sa natalang kaso sa Coronavirus Disease 2019 (COVID-19) Delta variant sa lugar.
Gipasabot sa alkalde nga lisod magpatuman og travel ban tungod kay dili makita ug masuta sa checkpoint kung ang biyahero positibo sa COVID-19 ug unsa kini variant.
“Walay tay naistoryahan na travel ban gikan sa Cagayan De Oro City, as I’ve said, number one, dili man gud makita ang tao nga asymptomatic, invisible to the naked eye ang COVID-19 virus, number two dili ta kabalo unsa nga klase nga variant na siya,” sulti sa mayor.
Sa pagkakaron, magpabilin ang gipatuman nga symptoms screening sa mga border sulod sa rehiyon ingon man sa regional borders subay sa guidelines sa joint resolution sa Regional Task Force ug Regional Inter-Agency Task Force (RTF-RITF).
Base sa July 20, 2021, gibutyag sa Department of Health (DOH) nga walo na ang aktibong Delta cases sa Pilipinas ug 4 niini anaa sa CDO.
RadyoMaN Kirby Manzon
