Davao City – Gibutyag sa Bureau of Fire Protection (BFP) nga adunay pagsaka sa insidente sa sunog karon nga tuig sa syudad sa Davao apan mi-ubos ang damyos niini kung itandi sa 2018.
Sa interbyu sa DXDC RMN Davao kang Senior Fire Officer 3 Ramil Gillado, Chief Investigation officer sa BFP-XI, gikumpirma niini nga sa ilang datos, miabot sa 439 ka fire incidents ang natala gikan sa Enero hangtud Nobyembre sa 2019 mas taas sa 422 nga insidente sa susamang period sa 2018.
Samtang dako usab ang gi-ubos sa damyos sa sunog diin anaa sa P127M ang natala sa 2018 ug P73M karon nga tuig. Gipasabot ni Gillado nga mitaas ang insidente sa sunog tungod sa mga natala nga ‘non-structural’ nga insidente sama sa grass fire o ginagmayng sunog.
Sa casualty, anaa sa lima ang natala sa 2019 ug upat sa 2018 samtang mi-ubos ang injured gikan sa 37 sa 2018 ug 20 karong tuiga.
Pahimangno ni Gillado nga mag-amping kanunay aron maselebrar nga malipayon ug luwas ang Pasko ug Bag-ong Tuig.
RadyoMaN Kirby Manzon
