Davao Oriental gitakdang ipalawom sa State Calamity

Gipaabot na lang ang Provincial Disaster Risk Reduction and Management Council (PDRRMC) sa Davao Oriental nga maaprubahan sa Sangguniang Panglalawigan (SP) ang pagpailawom sa entero probinsya sa Davao Oriental sa State of Calamity tungod sa epekto sa shear line nga miresulta sa pagbaha ug landslide.

Sa interview sa DXDC RMN Davao sa PDRRMC Davao Oriental, posibleng karong adlawa, Enero 24, 2024, aprubahan sa SP ang pagpailawom sa State of Calamity sa tibuok probinsya.

“Ang SP ang mag-approve sa province pero ang mga munisipyo, naa nay nag-declare og State of Calamity (nga mao ang) Caraga, Tarragona ug Lupon,” matud sa CDRRMC personnel.

Matud sa PDRRMC nga ang rekomendasyon, nakabase sa gipahigayon nga Rapid Damage Assessment and Needs Analysis (RDANA), diin nasayrang muabot sa 63,377 ka pamilya sa probinsya ang apektado.

Samtang, gibana-banaang anaa usab sa P111 million ang damyos nga gibilin sa kalamidad ngadto sa agriculture ug fisheries samtang anaa sa P1.7 million ang damyos sa livestock.

Nagbaton usab og damyos sa mga tulay, dalan sa matag lokalidad ug sa ilang flood control.

Una nang gipailawom sa State of Calamity ang Davao del Norte ug Davao de Oro tungod gihapon sa epekto sa shear line.

RadyoMaN Kirby Manzon