Davao City – Conspiracy kun ‘inside job’ ang gitutokan karon sa Mati City Police Station sa gipalawmang imbestigasyon sa nahitabong jail break sa Purok Maligaya, Barangay Sainz, Mati City, Davao Oriental niadtong Agosto 14, 2021.
Sa interbyu sa DXDC RMN Davao kang Police Major Bembo Aying, Chief of Police (COP) sa Mati City PNP, gibutyag niini nga subay sa footage sa closed-circuit television (CCTV) camera, makita nga hapsay ang pagsulod sa anaa sa 19 ka tawi nga miyembro sa Pinatikan Religious Group.
Nasayran usab sa COP nga abri nang daan ang gate sa primary detention cell ug ang selda asa nahimutang ang gi-rescue nga religious leader ug lain pang unom nga kaubanan niini.
“Tan-awon man gud nimo sa CCTV, smooth sailing ang ilang pagsulod. Second, walay violent reaction bitaw sa part sa gwardya. Wala man sila namusil o unsa nga nakita nila nga gi-rush up sila sa mga nagdala ra’g sundang,” saysay ni Aying.
Anaa sa one (11) ka gwardya nga maoy naka-duty sa maong panahon ang posibleng mapasakahan og kasong criminal negligence tungod sa panghitabo.
Karong Biyernes (Agosto 27, 2021), matud sa police official laumang mahuman ang imbestigasyon ug mapasaka ang tukmang kaso alang sa nahisgutan.
RadyoMaN Kirby Manzon
