Davao City – Dili usa pasudlan ang Davao Oriental Provincial Medical Center (DOPMC) sugod kargahapong adlawa (Enero 25, 2021) human nga anaa 31 ka personahe sa ospital ang nagpositibo sa Coronavirus Disease 2019 (COVID-19) subay sa impormasyon nga gipagula sa Davao Oriental Provincial Information Office.
Sa anunsyo sa Provincial Government of Davao Oriental, rason usab sa ‘temporary closure’ mao ang nagkadaghan nga kaso sa COVID-19.
Sirad-an ang balay tambalanan sulod sa napulo (10) hangtud katorse (14) ka adlaw, paghatag panahon sa disinfection, isolation ug risk testing sa tanan niining mga empleyado ug uban pang contacts.
Sulod sa maong panahon, wala usay dawaton nga pasyente.
Samtang padayong atimanon ang na-admit na daan ug i-discharge sa pinakadali nga panahon.
Giawhag ang publiko nga muadto sa pinakaduol nila nga health centers, city/municipal health office, district hospitals o bin ba kaha sa private clinics ug hospitals para sa ilang mga panginahanglang medikal.
Ang DOPMC Telemedicine hotline sa Davao Oriental Provincial Medical Center Facebook page magpabiling abri ug mag-refer og pasyente ngadto sa One Hospital Mindanao Command Center pinaagi aning mga numero: GLOBE (09064875995), SMART (09208419965) ug (082) 2272731 local 1120.
RadyoMaN Kirby Manzon
