Davao City – Padayong masaksihan sa mga Davaoeños ang Pasko Fiesta sa Davao taliwala sa pandemya ug uban pang aktibidad sa Pasko karong tuiga, 2021.
Matud ni Davao City Mayor Sara Duterte-Carpio (sa interbyu sa city-owned radio) nga kini himuon online sama sa gibuhat sa milabay nga tuig.
Giluwatan sa alkalde nga pangandaman ang maong Digital Pasko Fiesta celebration uban ang mga pribadong sektor nga maghatag gihapon og lingaw sa mga Davaoeños.
“In partnership with the private sector, duna ‘tay preparations for an online Pasko Fiesta,” sulti sa mayor.
Samtang, aduna usab gihapoy himuong Pahalipay sa Pasko para sa mga Lumad nga ginapahigayon na kaniadto bisan wala pa ang pandemya, kung asa ginasaka ang mga pahalipay sa mga lumad partikular na sa distrito sa Paquibato, Davao City.
“Same practice for the past years even before the pandemic, atong isaka didto ang atong mga pahalipay para sa mga lumad kung asa ang ilang mga areas sa mga barangay,” saysay sa alkalde.
Gipangandaman usab karon ang pahalipay alang sa tanan diin kini himuon pinaagi sa SafeDavao QR (DQR) nga kasamtangan pa karong gina-develop.
“We are preparing for an online pahalipay para sa tanan. It will be through the DQR. Gina-develop pa na siya karon sa atong team. So, hopefully, mahuman na sila very very soon so that people will be given instructions how to access,” butyag ni Duterte-Carpio.
Kini ang ikaduhang tuig nga himuong digital ang mga aktibidad sa Pasko sa syudad tungod sa nasinatian karong pandemya tungod sa Coronavirus Disease 2019 (COVID-19) nga nagsugod sa milabay nga tuig, 2020.
RadyoMaN Kirby Manzon
