Davao City – Positibo ang Commission on Higher Education (CHED)-XI nga maaprubahan ang mga eskwelahan sa Davao Region nga nag-apply alang sa limited face-to-face classes partikular na ang medical-related programs/courses.
Sa interbyu sa DXDC RMN Davao kang Dr. Christopher Pio O. Pulido, Supervising Education Program Specialist (SEPS) sa CHED-XI, gibutyag niini nga anaa na sa pito (7) ka mga pribadong tunghaan sa Davao Region, ang nag-apply karon sa CHED aron makapahigayon og limitadong physical classes.
Sa pagkakaron, nagpadayon ang assessment niini aron masigurong ma-comply ang stringent retrofitting ug health standards nga gi-impose sa CHED, Department of Health (DOH) ug COVID-19 Inter-Agency Task Force for the Management of Emerging Infectious Diseases (IATF-EID).
“Naay mga specific requirements that kailangan gyud nga i-comply sa school such as configuration sa ilang laboratories, facilities and so on and kadtong mga required health protocols nga kailangan,” saysay ni Pulido.
Matud sa CHED-XI official, usa sa tumong nga gi-una ang health-related courses aron makahuman sa kurso ang mga estudyante ug makatabang usab sa COVID-19 response sa gobyerno. Naglaum siyang magbaton na usab og face-to-face classes ang uban pang kurso sa dili madugay.
Kagahapong adlawa (Marso 26, 2021) nagpagawas ang CHED og listahan sa 23 ka mga college ug university kun Higher Education Institutions (HEIs) sa nasud nga gi-aprobahan alang sa limited face-to-face classes nga magsugod sa ikaduhang semester sa Academic Year (AY) 2020-2021, apan wala pay eskwelahan gikan sa Davao Region ang nalakip sa listahan.
RadyoMaN Kirby Manzon
