Davao City – Dako ang paglambo sa sektor sa negosyo dinhi sa Rehiyon 11 karong tuig 2018.
Kini mao ang panlantaw ni Davao City Chamber of Commerce and Industry Inc. (DCCCII) president Arturo Milan kinsa nagpamatuod nga usa na dinhi ang paspas nga pagpatukod sa mga dagkong imprastraktura ingon man establisemento sa syudad.
“If we continue upgrading the basic infrastructure, dako ang development pa niini,” matud ni Milan.
Nagtoo si Milan nga usa sa rason niining kalamboan mao ang gipatumang Martial Law diin ang pinakadakong nakabenepisyo mao ang syudad sa Davao gawas nga mao usab kini ang hometown ni Pangulong Rodrigo Duterte.
Gani walay nakitang negatibo ang predsidente sa DCCCII sa pagpalugway pa og usa ka tuig sa Martial Law dinhi sa Mindanao sanglit mabati sa mga investors nga luwas ang nahimutangan sa ilang negosyo.
Sa pikas bahin, aduna usab negatibong epekto ang kalamboan sa Davao region subay sa kalamboan sa ekonomiya niini sama sa traffic congestion sa Davao apan hinay-hinay na kining ginasolusyonan sa kagamhanan sama sa pagmontar og coastal roads ingon man mga by-pass roads.
Samtang giawhag niini ang tanang negosyante nga preserbahon ang kinaiyahan kinsa usab usa sa mga dakong apektado sa nagapanghitabo nga kalamboan.
RadyoMaN Jason Amisola
