Davao Region top 4 HVI arestado, dul-an P1 million kantidad sa shabu narekober

Davao City – Dul-an P1M sa shabu ang nasakmit sa Top 4 High Valued Individual Regional Level sa gilusad nga joint buy bust operation sa Regional Special Operation Group-Regional Police Drug Enforment Unit 11 (RSOG-RPDEU) ug Sta. Ana Police Station 1 sa R. Castillo St., Brgy. Lapu-Lapu, Agdao, Davao City.

Giila ni PMaj Jake C Goles, Station Commander sa Sta. Ana Police Station, ang suspek nga si Arnulfo Ferraren Sefuentes, alias “Tata”, 47 anyos, residente sa Fatima Village, Bajada, Brgy. 19-B, Davao City.

Sumala ni Goles nakuha sa suspek ang usa ka medium size ug dako nga pakete sa shabu nga anaa sa 57 grams ug mukantidad sa P912,000.00 ang street market value.

Gibutyag ni Goles, ang nadakpang suspek notadong tigpayuhot og illegal nga droga sa nagkadaiyang parte sa Davao ug naggikan sa Cotabato City ang iyang supply sa shabu.

“Sa laki ng nakuha na droga sa kanya, makakaapekto rin ito sa transaksyon ng illegal drug activities,” sumala ni Goles.

Kasohan og paglapas sa Republic Act 9165 o Comprehensive Dangerous Drugs Act of 2002 ang suspek karong adlawa, Lunes, (Marso 28, 2022).

RadyoMaN Aimee Guinita