Davao City – Gitutokan karon ang pagsaka sa tubig sa Davao River tungod sa mga pag-ulan nga dala sa daut nga panahon o ang ginabantayan nga si bagyong Samuel.
Sa pakighinabi sa DXDC RMN Davao kang Rodrigo Bustillo, operation chief sa Davao City Risk Reduction and Management Council (DCRRMC), miingon kini nga naka close monitoring sila karon sa Davao river.
Pahimangno ni Bustillo sa mga residente nga duol sa kasapaan nga kung mamatikdang adunay pagtaas sa tubig, gilayon nga mag-evacuate ug makipag-alayon sa mga barangay officials alang sa temporary shelters sa mga evacuation centers.
Gisiguro usab ni Bustillo nga mahatagan gilayon og advisory ang katawhan aron mahatagan pa og igo nga panahon nga makapanghikling ug dili na mahitabo ang insidente kaniadto nga adunay mga na-trap sa mga lugar nga gibaha.
Saysay pa ni Bustillo nga posibleng mahitabo ang nahitabo kaniadto sa bagyong Vinta diin gibaha ang dakbayan sa Davao dala sa tubig gikan sa Bukidnon area bisan pa man og wala nakasinati og mga pag-ulan ang sentro sa dakbayan.
RadyoMaN Kirby Manzon
