Davao City – Gumikan sa kabalaka sa nahitabong aksidente sa Samal barge karon lang semanaha, pipila ka mga netizens ang nagtoo nga kinahanglan na matukod ang Davao-Samal bridge.
Sa Facebook post sa DXDC RMN Davao, gipadayag ni Arz Zta nga kinahanglan ang maong tulay alang usab sa kaluwasan sa katawhan nga mubyahe sa duha ka mga lugar ug malikay sa susamang nahitabo.
Mao sab kini ang buot nila ni Allan Visto ug PJ Christian Zamora apan komento niini nga wala kaniadto pang 1978 ang maong hisgutanan apan wala pa gihapon kini ma-realisar.
Apan nagtoo si Chinny Lei ug uban pang netizens nga ang kinahanglan lang aron malikay sa mga susamang disgrasya mao ang magmaigmaton.
Subay niini, nakita sab ni Island Garden City of Samal (IGaCoS) Mayor Al David Uy ang panginahanglanon sa pagpatukod sa tulay nga mukonektar sa syudad sa Davao ug IGACOS sa rason nga dako kini’g tabang panahon nga adunay mga wala damha nga sitwasyon.
“Kay syempre paspas ang rescue and other LGUs can easily come to our aide kung naay mga emergencies,” segun niini.
Apan sa pagkakaron nga wala pa ang maong tulay, nagpahimangno kini sa mga byaheros nga kanunay mag amping ilabi na kung gabii ug nalango sa bino.
Alayon sab niini, una nang gikanayon ni Department of Public Works and Highways (DPWH-XI) Regional Director Allan Borromeo posibleng sugdan og tukod ang Davao-Samal bridge sa tuig 2020 diin sunod tuig lauman nga mahuman ug ipagawas na ang disenyo sa maong tulay.
RadyoMaN Jason Amisola
