Davao City – Ginasuta na karon sa City Government of Davao ang mga eskwelahan nga mamahimong mukwalipika sa limited face-to-face (F2F) classes human kini giaprubahan ni Presidente Rodrigo Duterte partikular sa mga minimal risk-areas.
Gisulti ni Davao City Mayor Sara Duterte-Carpio (sa interbyu sa city-owned radio) nga nakigkoordinar na ang Department of Education (DepEd) sa lokal nga gobyerno ug gipasumiter og mga eskwelahan nga iapil sa F2F classes pilot testing.
Sa panagpulong usab uban ang Davao City COVID-19 Task Force, nasabutan nga kuhaon ang mga pampublikong eskwelahan sa mga barangay nga gikonsiderang minimal ang risgo sa Coronavirus Disease 2019 (COVID-19).
“It was agreed didto sa COVID-19 Task Force nga ang 182 barangays nato, i-rank sila according to (COVID-19) risk. So, ang kuhaon nato og schools will be the barangay number 180, 181 and 182 and we will get one school from each barangay and mao na siya ang atong i-submit for limited face-to-face classes,” sulti sa mayor.
Samtang, gilauman na usab nga magbaton og F2F classes ang mga kwalipikadong kolehiyo ug unibersidad sa dakbayan partikular na alang sa allied medical ug medical courses oras nga aduna na usay pormal nga komunikasyon alang niini ang Commission on Higher Education (CHED).
RadyoMaN Kirby Manzon
