Davao City – Alerto karon ang security forces sa syudad sa Davao human sa nahitabong pagpamomba sa may Crossing Makar, Brgy. Apopong, General Santos City kagahapong adlawa nga gikaangol sa pito ka mga indibidwal.
Sumala ni Police Regional Office (PRO-XI) Director Police Chief Supt. Marcelo Morales, gimanduan na niini ang iyang ginsakpan nga pahugtan ang strategic checkpoints ug ang target hardening ingon man dili pawad-an og presensya sa kapulisan ang nagakadaiyang dapit sa syudad aron masigurong dili malutsan sa mga di’ maayong buhat sa mga terorista.
Nakigkoordinar na usab ang kapulisan sa ubang security forces ug gipakusgan ang intelligence monitoring uban ang law enforcement units.
Pahimangno sa kapulisan sa publiko nga magpabiling alerto ug makigkoordinar sa otoridad og adunay mamatikdang kadudahang lihok.
Subay sa maong panghitabo, gikondena sa kapulisan sa Davao ang hininuman sa mga terorista ug nagpaabot og pahasubo ngadto sa mga nabiktima ug mga kabanay niini.
RadyoMaN Renz Barbarona
