Davao City – Dakong suplayer sa shabu ang nasikop sa gilusad nga buy-bust operation sa Buhangin PNP nga gihimo sa may dalang Magallanes ning siyudad sa Dabaw ganihang ala-1:30 sa kadlawon.
Nakuha gikan sa suspek nga si alyas Saybin Abubakar Mala, alyas “Paolo”, 19 anyos, ug taga-Marawi City ang usa ka dakong sachet sa gituohang shabu nga mukantidad og 50-mil ka pesos.
Giangkon ni Saybin nga lima na ka buwan kini gasuplay og shabu sa iyang mga customers diin ilang ginahimo ang transaksiyon dinhi sa dakbayan sa Dabaw.
Gitug-an ni Saybin nga usa ka Engineer Lowell nga taga-bukidnon ug alyas Clyde nga taga-Maramag ang iyang iyang mga customers ug ga-order kaniya og iligal nga droga ug dinhi sa syudad mag-abot sila.
Gibulgar pa ni Saybin nga usa ka alyas JV ug ig-agaw ni Engineer Lowell kinsa pareho napreso karon sa Davao City Jail tungod gihapon sa kasong droga ang iyang contact ngadto sa duha niya ka customers.
Karong adlawa, gikatakda isang-at sa Buhangin PNP ang kasong may kalapasan sa Republic Act 9165 sa hawanan piskalya ning syudad batok sa dinakpan.
RadyoMaN Joel Viray
