Davao City – Pangunahan sa Office of the Building Official (OCBO) ang implementasyon sa napasar nga ordinansa sa konseho labot sa pag-require og saktong ventilation system sa mga pampubliko ug pribadong opisina ug establisyemento sa syudad sa Davao.
Kini aron usab nga malikayan ang transmission sa Coronavirus Disease 2019 (COVID-19) sulod sa usa ka lugar labi na nga sagad natala ang COVID-19 cases diha sa mga trabahoan.
Sa interbyu sa DXDC RMN Davao kang Engineer Cirinia Grace Catubig, OCBO Officer-in-Charge, gibutyag niini nga subay sa ordinansa, multang P5,000 ang atubangon alang sa second offense ug sa third offense mao ang pagkansela sa ilang permit.
“Pag annual inspection namo, og ang kuan (assessment) sa inspector gina-note na namo kay dili namo sila maisyuhan og annual building (certificate). I-incorporate na nila para renovation in compliance sa city ordinance, nga dapat magbuhat na sila og mga window (ventilations),” segun ni Catubig.
Hinuon, aduna usay ihatag nga notice of violation diin hatagan og kinse (15) diyas ang mga establisyemento sa pagbaton og ventilations sama sa bintana, pultahan, exhaust aron dili magpondo ang hangin, inay kini makagawas-sulod aron likay sa risgo sa unsa mang balatian.
RadyoMaN Kirby Manzon
