Davaoeño: P200 monthly ayuda sa poor families dili paigo

Davao City – Gipasibaw sa usa ka Davaoeño ang iyang kumento human giaprubahan ni Presidente Rodrigo Duterte ang paghatag og P200 matag bulan nga ayuda sa gikonsiderang poor families, tubag sa padayong pagtaas sa presyo sa produktong petrolyo.

Sa interbyu sa DXDC RMN Davao kang Marlou Salazar, usa ka inahan, taga Barangay 9-A, Davao City, gisaysay niini nga gamay ra kaayo ang P200 ilabina sa taas nga presyo sa mga palaliton karong panahona.

Dugang ni Salazar, mas maayo kung patas-an pa ang kantidad sa subsidy ilabina sa sitwasyon karon diin ubay-ubay usab ang nawad-an og trabaho tungod sa pandemya.

“Pirti gyud nang kulanga kay sa karon, pirti gong mahala karong palitonon. Unsa may mapalit anang P200? Bugas pa lang daan tagpila nang kilo, isda. Unsa may mapalit anang P200 unya pareha anang walay mga trabaho. Kung pwede, siguro P1,000,” sulti ni Salazar.

Nasayrang duha ka rekomendasyon sa Department of Finance (DOF) ang giaprubahan sa presidente nga mao ang pagpadayon sa fuel excise taxes nga giimposar sa Tax Reform for Acceleration and Inclusion (TRAIN) Law ug ayuda nga P200 alang sa bottom 50% sa Filipino households.

RadyoMaN Kirby Manzon