COVID-19 TF: Davao district vaccination sites isirado

Davao City – Gibutyag sa Davao City Coronavirus Disease 2019 (COVID-19) Task Force (TF) nga ubay-ubay ka mga eskwelahan sa syudad sa Davao nga gihimo isip Coronavirus Disease 2019 (COVID-19) vaccination sites ang isirado karon sa lokal nga panggamhanan.

Matud ni Dr. Michelle Schlosser, tigpamaba sa Davao City COVID-19 TF (sa interview sa city-owned radio), gamiton na sa Department of Education (DepEd) ang maong mga eskwelahan alang sa pagpangandam sa face-to-face classes.

“Tungod kay booster na man lang ang atoang pinakadaghan and then ang atong mga pediatric population. So unfortunately, we will be closing district vaccination sites,” sulti ni Schlosser.

Gibutyag ni Schlosser, ang maong mga eskwelahan mao ang Magallanes Elementary School (ES), F. Dizon ES, Matina Aplaya ES, Buhangin Central ES, Malagos ES, Maa National High School , ug ang Mintal Central ES.

Hinuon, dili angay mabalaka ang vaccinees ilabina kadtong anaa sa pediatric population tungod kay abli gihapon ang People’s Park, Crocodile Park, ug Magsaysay Park, ug magpahigayon usab og pagbakuna sa mga mall sa dakbayan.

RadyoMaN Kirby Manzon