Davao City – Malaumon ang usa ka Davaoeño nga nagpuyo sa United States of America (USA) nga subling mabutang sa pwesto si President Donald Trump (Republican Party) batok ni Joe Biden (Democratic Party) sa gipahigayong eleksyon karon sa Amerika.
Sa interbyu sa DXDC RMN Davao kang Armelen Williams, taga Davao de Oro nga nagpuyo karon sa Centennial, Colorado, USA, gibutyag niini nga suportado sa mga Pinoy sa Amerika si Trump tungod sa maayong pagdumala niini sa ilang nasud.
Matud ni Williams nga kung mudaog si Biden, ilang gikahadlokan ang pipila sa plano niini sama sa pagpataas sa tax lakip na ang health insurance ug ang paghimong legal sa ‘abortion’.
Gibutyag niini nga safety usab ang sistema sa pagboto sa Colorado diin mamahimo lamang nga ipaagi sa email ang imong boto o kaha ihulog sa drop box sa ilang lugar, ug aduna usay pagboto pinaagi sa drive-thru.
“Dili man hadlok (sa COVID) kay email ra man diria. Walay voting precinct diria. Email lang nimo or ihulog nimo sa mga drop box drea sa county,” segun ni Williams.
Nanghinaut ang Pinay nga walay mahitabong kagubot diin sagad sa ubang lugar nagabaton og riot ang mga supporters labi na kung mapildi ang ilang kandidato sa piniliay.
RadyoMaN Kirby Manzon
