Atol sa presscon niadtong Sabado, April 13, 2024, gisulti ni Uy nga ‘no one above the law’ bisan unsa pa man ang imong posisyon sa gobyerno. Gitambagan sa acting governor nga kabahin sa due process ang direktiba ug kinahanglan lamang nga atubangon ug tubagon ni Jubahib ang mga alegasyon batok kaniya.
Samtang, walay lipod-lipod nga gitataw ni Uy nga manrabaho ra kini kung unsa ang gitahas kaniya. Gani, nalipay siya kung unsa nga posisyon naa siya karon ug wala siya nangandoy og mas taas pa nga posisyon sa gobyerno sa probinsya.
“Daghan niistorya sa akoa, daghang ni-chat niingong ‘Congratulations, Gov. Congratulations, Acting Gov.’ Kabalo mo unsa akong tubag? Wala ko niingong og salamat. Niingon ko, ‘Trabaho lang ‘ta. Trabaho lang gyud ‘ta.’ Giingnan man nako na si Kuya (Gov. Jubahib), naa man kay last term. Bata pa pud ko. Kung nangambisyon man ko anang posisyona, ingnan ‘ta ka karon pa lang daan, wala,” tataw ni Uy.
Matud ni Uy nga sulod sa 60 ka adlaw sa iyang paghulip isip acting governor, iyahang siguradohon nga dili malangay, inay paspas ang pagtunol sa serbisyo sa katawhan sa Davao del Norte.
RadyoMaN Kirby Manzon
