Davao City – Andam na alang sa umaabot nga opening ceremonies sa Davao Regional Athletic Association (DAVRAA) Meet 2018 ang host Davao City.
Kini maoy gibutyag ni Department of Education (DepEd-XI) spokesperson Jenielito ‘Dodong’ Atillo sa pakighinabi kaniya sa programang ‘Straight to the Point’ diin iyang giingon nga nagahulat na lamang sila sa pormal nga pagbukas sa sporting event karong Pebrero 18, 2018.
“We’re just waiting for the opening on February 18. Naa nay mga nangabot gikan sa Samal, Digos, Davao del Norte ug daghan pa diin giseguro nato nga maplastar ang atong mga kaigsoonan,” segun ni Atillo.
Gani gilauman nga adunay total nga 6,608 ka mga athletes, coaches, chairpersons, technical officials ug tournament players ang moabotay dinhi sa syudad.
Dugang sa tigpamaba, ang DAVRAA Meet 2018 usa sa pinakadakung kalihukan sa dakbayan diin malaumon siya nga mamahimo kining mas mabulokon ilabi na nga 20 anyos na ang nakalabay sukad nga gipahigayon nganhi ang maong torneyo sa paugnat sa kusog sa mga atletang estudyante.
Gidugang usab ni Atillo nga abli usab ang Davao nga mamahimong host sa umaabot nga Palarong Pambansa 2019 kun palaron ug mahatagan sa talagsaong higayon nga mamahimong venue sa maong aktibidad.
RadyoMaN Jason Amisola
