Davao City – Walay nakita nga rason ang Davao City Health Office aron sundugon sa dakbayan sa Davao ang gihimo karon sa Davao Del Sur diin gimandaran ang tanang empleyado sa kagamhanang probinsiyal nga magsuot og face mask una pa man tugtan nga maka-duty kun makasulod sa ilang trabaho nunot sa pagkuyanap karon sa coronavirus disease 2019 kun COVID-19.
Sumala ni CHO Spokesperson Dr. Gene Gulanes, ang gitugtan lamang nga makagamit kun makasuot og face mask mao kadto lamang mga natakbuyan og balatian kun adunay COVID-19 ug dili ang mga maayo ug himsog pa ang panglawas.
Dugang ni Gulanes nga ang katuyoan sa face mask mao ang pagpakgang sa virus nga dili makatakod ngadto sa ubang tawo kun sa mga walay sakit diin mao kini ang hinungdan nganong ang mga nagpositibo sa virus gi-require gayod nga magtaptap sa ilang baba ug ilong.
Gipasabot ni Gulanes nga kun pasagdan ang publiko nga magpaturagas og gamit sa face mask, basin pag-abot sa panahon mahurot ang stocks ug walay nay mapalit nga face mask sa mga botika ilabi na nga usa ra ka adlaw gamiton ang face mask dayon ilabay.
Gikontra usab ni Gulanes ang pagtoo sa kadaghanan nga epektibong pangsanta sa pagkuyanap sa COVID-19 ang pagsuot og face mask sanglit ang virus mangita gayod og lungag aron maka-penetrate ug makagawas sa lawas sa usa ka tawo nga infected sa nasangpit nga balatian.
RadyoMaN Joel Viray
