Davao City – Nagpahimangno ang Matanao Police Station (MPS) sa Davao del Sur sa ilang mga residente nga likayan ang paggamit og pabuto sa pagsugat sa Bag-ong Tuig, bisan pa man og wala gidili ang paggamit niini sa probinsya.
Sa interbyu sa DXDC RMN Davao kang Police Staff Sergeant Ronelyn Gomez, personahe sa Matanao MPS, gibutyag niini nga adunay mga designated areas nga pwedeng magpahigayon og fireworks display ang publiko.
Gipasabot ni Gomez, mas maayo gihapon nga mugamit og alternatibong pamaagi sa pampasaba sa pagsugat sa 2023 aron malikayan ang aksidente.
“Kung mahimo, likayan nalang gyud nato ‘tong mga pabuto para malikayan gyud nato nga walay disgrasya nga mahitabo sa pagsugat sa Bag-ong Tuig,” tambag niini.
Pipila sa mga girekomenda sa Department of Health (DOH) nga pampasaba sa pagsugat sa Bag-ong Tuig mao ang kusog nga musika, serbato sa sakyanan o kaha paggamit og lata o mga gamit sa balay nga pampasaba.
RadyoMaN Kirby Manzon
Facebook Comments
