General Santos City—Mag-atubang ug kasong pagsupak sa RA 9165, sec 5 ug 11 sa Art II kon Comprehensive Dangerous Drugs Act of 2002 ang suspetsadong si Rendenzon Quizo alyas Denden, legal age ug temporaryong nanimuyo sa Sunrise Village Barangay Fatima ug lumad nga taga zamboanga city human nga napalitan kini ug isa ka sachet sa gituohang shabu alas 12:00 ang takna sa udto sa Fil-am Road, Barangay Calumpang sa gipahigayong buy-bust operation sa personahe sa City Police Drug Enforcement Unit kon CPDEU.
Sumala pa ni Police Major Ruelito Lumiguid ang labaw sa CPDEU nga temporaryo lang nga nagpuyo sa Gensan ang nasampit nga suspect ug gikan kini sa Zamboanga City diin midayo lang sa syudad aron nga mamaligya ug iligal nga droga.
Napalitan ug usa ka sachet nga shabu ang nahisgutan ug nakuha usab sa iyahang posisyon ang lain pang duha ka mga medium sachet sa shabu nga gibana-banaang nagkantidad P15,000.00 ug ang 500 pesos nga mark money.
Dugang pa ni Major Lumiguid nga wala sa ilahang watch list ang pangalan sa suspect nga nagapayuhotan ug droga sa syudad tungod kay dayo lang kini apan migula matud pa ang pangalan niini human nga gitudlo sa una nang mga dinakpan sa CPDEU sa ilahang mga operasyon kung asa ang maong suspek maoy ilang supplier sa gidiling droga. (Dave Silagan)
