Davao City – Giklaro karon sa kadumalahan sa Davao City Overland Transport Terminal (DCOTT) ang palisiya labot sa entry kun pagsulod sa mga bagahe sa mga pasahero labi na panahon sa Undas.
Sa interbyu sa DXDC RMN Davao kang Aiza Usop, DCOTT manager, gisaysay niini nga gawas nga mu-agi ang mga pasahero sa walkthrough machine sa entrance sa terminal, angay usab nga i-agi ang ilang mga bagahe sa baggage x-ray machine aron masigurong walay makalusot nga gibawal nga mga gamit.
“Ang tanang mga bagahe sa atoang mga pasahero kinahanglan ipa agi sa atong baggage x-ray machine aron sa pagtan-aw, ma-inspeksyon ug ma-assure gyud nato nga atoang makita ang ilang mga bagahe,” saysay ni Usop.
Pahimangno ni Usop sa mga bus nga musulod sa terminal nga kinahanglan usab nga walay bagahe nga isulod daan sa compartment alang sa seguridad sa Davao terminal.
Nasayran nga gilauman na sa DCOTT management ang dagsa sa mga pasahero sa maong panahon.
RadyoMaN Kirby Manzon
