DCOTT: Biyahe sa bus karong pasko magdepende sa pasahero

23

Davao City – Aduna gihapoy biyahe nga bus sa Davao City Overland Transport Terminal (DCOTT) karong adlaw sa Pasko (December 25, 2021).

Sa interbyu sa DXDC RMN Davao kang Aiza Usop, Manager sa DCOTT, gisulti sa mga bus operator nga aduna gihapon silay biyahe apan kini magdepende gihapon kini kung adunay mga pasahero karong adlawa.

Matud ni Usop nangayo usab og special permit ang mga bus companies sa Land Transportation Franchising and Regulatory Board (LTFRB)-XI alang sa biyahe karong holiday season. Ipatuman usab ang 50% capacity sa pasahero aron maobserba ang social distancing ug uban pang health protocols batok Coronavirus Disease 2019 (COVID-19).


“Matud pa sa atoang mga bus operators, mubiyahe sila (karong Pasko). Naay biyahe kay wala pay mando sa ilang main office nga dili sila pabiyahe-on. Kaya lang, ginatan-aw lang pud nila ang mga pasahero nato kung naa bay pasahero. Buot ipasabot kung walay pasahero, dili pud sila mubiyahe kay malugi pud sila,” saysay ni Usop.

Gidugang sa DCOTT Manager nga mas daghan ang pasahero karon nga Pasko kung itandi sa milabay nga tuig diin karon nga semana, muabot sa 700 hangtud na sa 800 bus trips ang matala matag adlaw.

RadyoMaN Kirby Manzon



Facebook Comments