Davao City – Gipaniguro karon sa kadumalahan sa Davao City Overland Transport Terminal (DCOTT) nga adunay i-montar nga express lane alang dagsa sa mga pasahero karong umaabot nga Undas.
Sa interbyu sa DXDC RMN Davao kang Aiza Usop, DCOTT manager, gisiguro niini nga adunay special lane alang sa mga senior citizens, person with disabilities (PWDs), mga nagsabak ug mga ginikanan nga adunay bitbit nga mga bata aron malikayan ang insidente labi na sa dagsa sa mga biyahero.
“Gipabutangan nato og duha ka lanes ang atong mga pasahero nga maglinya nga musakay. I-separate nato ang senior citizens, PWDs ug atoang mga buntis ug atoang mga nanay ug tatay nga adunay dala nga mga bata,” saysay ni Usop.
Gibutyag sa DCOTT manager nga ila nang gilauman ang pagtaas sa ihap sa mga pasahero sa maong panahon diin muabot sumala pa sa 1,200 pataas ka mga bus trips ang matala kada adlaw o mukarga sa 50,000 hangtud 70,000 ka mga pasahero ang musakay atol sa maong peak season.
RadyoMaN Kirby Manzon
