Davao City – Wala gihapoy biyahe sa mga bus sa Davao City Overland Transport Terminal (DCOTT) bisan pa man og anaa na ilawom sa General Community Quarantine (GCQ) ang syudad sa Davao ug entero rehiyon.
Kini ang giklaro sa DXDC RMN Davao ni Aiza Usop, DCOTT manager human sa mga pangutana kung aduna na bay biyahe sa bus padulong sa mga ilang mga probinsya karon nga anaa na sa GCQ ang region eleven.
Matud ni Usop nga subay sa direktiba sa City Transport and Traffic Management Office (CTTMO), wala pay biyahe ingon man schedule sa mga provincial buses.
“Base sa directive or order sa atoang department head sa CTTMO, ang atoang Davao City Overland Transport Terminal, wala pa tay provincial buses nga byahe. Wala pa gyud tay schedule. Wala pa ta nag open sa DCOTT terminal.” saysay ni Usop.
Bisan pa man, aduna nay plano ang DCOTT sa mamahimong sistema sa terminal ug sa mga biyahe panahon nga kini mubalik na sa operasyon.
RadyoMaN Kirby Manzon
