Davao City – Nagpahinumdom pag-usab karon ang Davao City Police Office (DCPO) ngadto sa publiko nga isumbong gilayon ngadto kanila ang mga insidenteng pagpangabuso.
Matud sa DCPO, angay kumbinsihon ang mga nabiktima sa klase-klaseng pagpang-abusar ilabi na mga kabatan-onan nga dili mahadlok sa kapulisan, gani mas maayo nga mudangop ngadto kanila kung aduna silay ginakahadlokan sama nalang sa mga nagapangabuso.
Mamahimong i-report ang bisan unsang ‘gender-related crimes ‘sa pinakaduol nga police station o mag-text pinaagi sa ‘Isumbong kay CD’ Hotline nga 09258233276.
Sa pikas bahin, nagpahimangno ang kapulisan sa dakbayan ngadto sa publiko kabahin sa mga angay buhaton aron mahimong hapsay ang paghandum sa ‘Kalag-Kalag’ o ‘Todos Los Santos’ karong Nobyembre 1.
Nagpahinumdom ang kapulisan nga kun walay mahibilin sa balay, gikinahanglang siguraduhong nakakandado ang tanang pwertahan ug naka-trangka usab ang mga bintana ug hipuson og tarong ang mga importanteng butang aron dili makawat.
Dugang niini, nagpahinumdom usab sila nga sigurohong walay nabiling nakasindi nga kandila, abri nga gas stove, nakasaksak nga appliances ug abri nga gripo.
Subling giingon ni DCPO Director Police Senior Supt. Alexander Tagum nga mag-amping kanunay ilabi na atol sa umaabot nga ‘Kalag-Kalag’ gawas o sulod man sa panimalay.
Alang sa mga buot mureport sa bisan unsang insidente, mamahimong magtext lang sa nasangpit nga ‘Isumbong kay CD’ text hotline o mamahimong mutawag sa 911 emergency numbers.
RadyoMaN Renz Barbarona
