Davao City – Dili ipadaplin ang seguridad sa matag pamilya kung musalmot man sa mga nagkadaiyang aktibidad ug mga kalingawan karon sa syudad atol sa Kadayawan Festival.
Nagpasidaan si Davao City Police Office Director Senior Supt. Alexander Tagum ngadto sa mga ginikanan nga bantayan og maayo ang ilang mga anak nga mulantaw sa Indak-indak ug Pamulak sa Kadayawan.
“Sa ilang pagsuroy kung pwedi butangan nila og pangalan, address ug cellphone number ug ibutang nila sa mga bulsa sa mga bata,” matud ni Tagum.
Gipasabot ni Tagum kay inkaso nga mabulag ang mga bata sa ilang ginikanan sa kadaghan sa tao dali dayong ma-contact ang mga ginikanan.
“Kabalo man ta ang mga bata ilabina katong dili pa makaistorya aron dili ta maglisod og hatag sa amo’g idea kung kinsa man ang ilang mga ginikanan ug kung taga-asa kining mga bata nga ma-report sa amo,” sumala ni Tagum.
Gitataw ni Tagum nga dili lamang mga law enforcement ug security forces apan lakip na ang publiko angay nga magdoble igmat ug magbinantayon atol niining dako nga selebrasyon sa lungsod.
RadyoMaN Aimee Guinita
