Davao City – Dili maingon sa kapulisan nga adunay koneksyon sa pandemya nunot sa COVID-19 ang nagapanghitabo nga incest rape ug ubang rape cases sa Davao City.
Kini ang gisulti ni Davao City Police Office (DCPO) spokesperson Police Captain Rose Aguilar atol sa interview sa DXDC RMN Davao.
Kini human nga adunay mga komento nga maong nahimo ang maong krimen tungod sa pandemya ug na-quarantine sulod sa balay ang mga tao.
“Actually, lisod ta musulti ana nga because of pandemic kay demonic act man gud na sa isa ka indibidwal nga manglugos… Dili ma-correlate sa pandemic kay di lang man sa pandemic ni nahitabo,” segun ni Aguilar.
Subay usab kini sa mga natalang rape cases sa Davao City sama atong usa ka amahan nga suspek sa pagpanglugos sa iyang anak diin ang maong suspek napusilan-patay sa Talomo PNP kagahapon, January 5, 2021 human giingong nangilog kini og pusil.
Samtang usa usab ka magulang ang nadakpan human gilugos ug nabuntisan niini ang iyang manghod nahitabo sa Marilog area ning syudad.
Hinuon Sumala sa DCPO, miubos ang ihap sa rape cases karong panahona dinhi sa syudad itandi sa miaging katuigan.
RadyoMaN Renz Barbarona
