Davao City – Wala gi-obliga ang usa ka empleyado nga magpakita og Daily Time Record (DTR) sa mga checkpoints pagpamatuod nga muadto kini sa trabahoan samtang ginapatuman ang Enhanced Community Quarantine (ECQ) tungod sa Coronavirus Disease 2019 (COVID-19).
Kini ang giklaro ni Police Captain Rosario Aguilar, spokesperson sa Davao City Police Office (DCPO) sa interbyu sa DXDC RMN Davao isip tubag sa pangutana ni alyas Gerald nga gipadangat sa sibyaanan human kini gipangitaan og DTR sa checkpoint rason nga hapit kini na-late sa trabaho isip banker.
“Wala po. Kadto lang atoa, kadtong certificate of employment nga didtoa sya nagtrabaho. Apil siya didto sa APOR kadtong authorized persons outside residence, kadtong mga exempted nga mga personnel nga dili na kinahanglan og FM pass. If didto siya naapil, dili siya affected anang FM pass,” saysay ni Aguilar.
Gipasabot ni Aguilar nga bisan og exempted sila kun APOR tungod sa ilang pagtrabaho sa bangko, kinahanglan gihapon nga masunod ang curfew hours labi na nga wala abri nga bangko sa gabii.
RadyoMaN Kirby Manzon
