Davao City – “We implement the Law without Fear or Favor.”
Gipanghimakak sa Davao City Police Office (DCPO) ang alegasyon sa Bagong Alyansang Makabayan Southern Mindanao labot sa alegasyong pagharang kanila aron dili makalusad og rally sa syudad sa Davao atol sa ika-upat nga State of the Nation Address (SONA) ni Pres. Rodrigo Duterte.
Sa opisyal nga pamahayag sa DCPO, gikanayon niini nga giharang sa PNP ug LTO/LTFRB ang maong grupo gumikan sa overloading ang jeepney nga gisakyan sa mga raliyista ingon man out-of-line kini diin klaro nga kalapasan sa Republic Act 4136 kun ang Land Transportation Traffic Code.
Dugang niini, gilimod usab sa DCPO ang akusasyon sa progresibong pundok nga nagapanghilabot ang gobyerno sa katungod sa katawhan nga molusad og mga rally o assemblies sanglit ginabuhat lamang sa awtoridad ang pagpatuman sa mga balaud.
Subling gibutyag usab sa DCPO nga ginapatuman nila ang maximum tolerance sa tanang mga protest rallies.
RadyoMaN Jason Amisola
