Sa interbyu sa DXDC RMN Davao kang Police Major Catherine Dela Rey DCPO Spokesperson gisulti niya, nakatutok karon ang Calinan Police Station sa maong mga insidente.
Gikumpirma ni Dela Rey nga nagpabiling missing pa si Espisona kinsa gikatahong gidagit niadtong Mayo 27,2023 adlawng Sabado sa wala pa mailang mga tawo nga naka-facemask ug gisakay sa usa ka Toyota Fortuner sa may La Roca Chapel Purok 1, Lacson, Calinan, Davao City.
Samtang, si Panzan kinsa gireport usab sa iyahang mga kabanay nga nawala niadtong Mayo 26 sa gabie adlawng Biyernes, nakabsan sa kinabuhi sulod sa balay tambalan.
Ang biktima giputos og packaging tape ang tibuok nawong ug nakaposas ang mga kamot dihang gi-endorso sa Talomo Police Station sa mga opisyales sa Barangay Matina Aplaya. Atol sa interbyu sa kapulisan, na-collapse, nag-seizure kini ug naglisod og ginhawa.
Gibutyag ni Police Major Noel Villahermosa atol sa interbyu sa DXDC RMN Davao, gisulti sa biktima nga giakusahan kini nga usa sa mga suspek sa Bragas Rape Slay case.
Sumala sa amahan sa biktima, daghang bun-og sa kalawasan ug adunay mga giingong paso sa sigarilyo si Dennis.
Susihon usab sa kapulisan kung konektado ba ang duha ka mga alleged kidnapping sa Calinan.
RadyoMaN Aimee Guinita
