Davao City – Gipaniguro karon sa Davao City Water District (DCWD) nga mamahimong makatarunganon ang planong usbaw sa bayronon sa tubig-mainum denhe sa syudad.
Sa interbyu atol sa morning primetime radio social commentary program ‘Straight to the Point,’ gisugilon ni Ms. Jovana Duhaylungsod, DCWD Deputy Spokesperson nga nagpadayon pa sa pagkakaron ang ilang review sa posibleng laing hugna sa water rate increase.
Matud ni Duhaylungsod, kung mapatuman man ang usbaw sunod tuig base sa balaud kinahanglan nga dili kini mulapas sa 60% sa present water rate nga P137 sa unang 10 cubic meters sa kada bulan samtang dili usab mulapas sa 5% sa income sa mga minimum wage earners.
Gibutyag ni Duhaylungsod nga mapadulong ang naasoy nga usbaw diha sa dugang pondo alang sa umaabot nga mga water projects sa musunod nga napulo ka tuig diin mas taas ang demand kaysa sa supply sa tubig nga gikinahanglan sa nagkadaghang ihap sa populasyon sa Davao.
Pikas bahin, walay paghisupak ang konsumanteng si Annie Panerio sa rate adjustment basta siguraduhon lamang nga makaya ra sa mga yanong tao ang ipatumang increase.
Dugang usab ni Panerio nga angay nga siguraduhon sa DCWD nga maayo gayud ang ilang serbisyo ngadto sa publiko aron kalikayan ang pagmahay kun pagbasol kanila sa consuming public.
RadyoMaN Aimee Guinita
