Truck de garga nga may FOOD PASS gakarga ug illegal nga kahoy
Gigamit ang food pass nga giisyu sa Department of Agriculture (DA) aron makalusot sa quarantine checkpoint ang usa ka Isuzu Forward nga nagkarga ug illegal nga pididos nga mga kahoy apan malampuson gihapon kini’ng naharang sa kwerpo sa kapulisan kagahapon.
Gibutyag ni P/Capt. Rodel Dorado, station commander sa Butuan City Police Station 4 nga alas 10 ang takna sa gabie niadtong adlaw’ng Sabado nakadawat na ug impormasyon ang kapulisan labot sa ibyahe nga illegal nga pididos nga mga kahoy nga gikarga sa Isuzu Forward nga nagdala sa plaka numero YDR 460.
Daling gipaalerto ang ginsakpan sa kapulisan ug sa dihang ni-agi na ang gitumbok nga forward positibo ang impormasyon nga nagbatun kini ug food pass aron dili unta harangon apan sa dihang gi-flag down kini gi-hurdle naman hinoon sa driver ang checkpoint sa PNP maoy hinungdan nga gipusil ang ligid sa atubangan sa sakyanan ug didto napugos sa paghunong ang driver.
Giila ang driver nga si Warlito Canoy, 45 anyos, minyu ug residenti sa Purok 1B, Brgy. De Oro ning syudad sa Butuan uban ang duha ka mga crew nga sila si Jesser Ian Escalante, 28 anyos ug Brian Pacto Jerson, 33 anyos parehong residenti sa Brgy. Agfa, Sibagat Agusan del Sur.
Sa paghiling sa kapulisan nasayran nga gibutang sa ilalom ang illegal nga mga kahoy ug gitabonan ug siren aron ipatuo nga humay ang karga apan nadiskobrehan ang mokabat sa 632 nga ginabas nga mga kahoy’ng mahogany ug antipolo kung diin pakyas ang driver sa pagpakita sa mga legal nga dokumento.
Sa pag-scale sa mga forest rangers sa DENR nasuta nga miabot sa 3,065.32 board feet ang mga kahoy nga nikantidad sa kapin P80,000. At large pa usab ang gitumbok nga tag-iya sa illegal nga kahoy nga si Roldan Dupalco, hingkod ang edad ug taga Brgy. Afga,
Sibagat kinsa misibat atol sa pagkasikop sakay sa color blue nga Mini Van ug padayon karong gipangita sa kwerpo sa kapulisan.
